रत्नागिरी जिल्ह्यात उत्साहात पार पडले अमृत परिवार सर्वेक्षण

महाराष्ट्र संशोधन, उन्नती व प्रशिक्षण प्रबोधिनी अर्थात अमृत या राज्य शासनाच्या स्वायत्त संस्थेतर्फे एप्रिल महिन्यात अमृत परिवार सर्वेक्षण करण्यात आले. अमृत ही संस्था खुल्या प्रवर्गातील आर्थिक दुर्बल घटकांच्या सर्वांगीण सक्षमीकरणासाठी कार्यरत आहे. संस्थेच्या योजना लक्ष्यित गटातील जास्तीत जास्त जणांपर्यंत पोहोचाव्यात, त्यांच्या अडचणी जाणून घ्याव्यात, याकरिता हे सर्वेक्षण करण्यात आले होते. रत्नागिरी जिल्ह्यातील सर्वेक्षणावेळी आलेले अनुभव....

रत्नागिरी जिल्ह्यात अमृत परिवार सर्वेक्षणाच्या निमित्ताने झालेला प्रवास केवळ कामापुरता मर्यादित न राहता अनुभवांनी समृद्ध करणारा, नव्या ओळखी निर्माण करणारा आणि समाजाशी अधिक घट्ट नाते जोडणारा ठरला. निसर्गरम्य तालुक्या-तालुक्यांमध्ये फिरताना अनेक कुटुंबांशी प्रत्यक्ष संवाद साधण्याची संधी मिळाली. लक्ष्यित गटातील नागरिकांना भेटून त्यांच्या अडचणी, अपेक्षा, गरजा आणि वास्तव परिस्थिती जवळून जाणून घेता आली. रत्नागिरी जिल्ह्याचा विचार करता अमृत संस्थेच्या योजनांची आवश्यकता किती मोठ्या प्रमाणावर आहे, याची स्पष्ट जाणीव या प्रवासात झाली. अनेकांना योजनांविषयी माहिती नसल्यामुळे ते वंचित राहतात, हेही लक्षात आले.

या प्रवासात काही ठिकाणी उत्तमरीत्या स्वागत झाले. त्यामुळे काम करण्याची प्रेरणा वाढली. काही ठिकाणी विविध प्रश्न विचारले गेले, शंका उपस्थित केल्या गेल्या आणि अनेक गैरसमज असल्याचेही लक्षात आले; मात्र या प्रत्येक अनुभवातून संवाद अधिक सक्षमरीत्या साधला गेला, योजनांची माहिती अधिक स्पष्टपणे मांडता आली आणि लोकांमध्ये विश्वास निर्माण करण्याची संधी मिळाली.

या प्रवासात विविध ब्राह्मण संघटनांचे पदाधिकारी, राष्ट्रीय स्वयंसेवक संघाचे कार्यकर्ते यांची भेट झाली. विचारांची देवाणघेवाण झाली, मार्गदर्शन मिळाले आणि सामाजिक कार्य अधिक प्रभावीपणे राबवण्याबद्दल सकारात्मक चर्चा घडली. या भेटींमुळे एक मजबूत सामाजिक जाळे तयार होत असल्याची जाणीव झाली. ते भविष्यातील कामांसाठी निश्चितच उपयोगी ठरेल.

या प्रवासात प्रत्येक दिवस नवा अनुभव देणारा ठरला. कधी एखाद्या कुटुंबाच्या समस्येने मन दुःखी झाले, तर कधी त्यांच्या आशावादी दृष्टिकोनाने उमेद मिळाली. सर्वेक्षणाच्या माध्यमातून केवळ माहितीचे संकलन न होता, एक चांगले नाते तयार होत गेले, हे या प्रवासाचे खरे यश आहे.

एकूणच, अमृत परिवार सर्वेक्षण अत्यंत यशस्वीपणे पार पडले. या प्रवासातून झालेल्या नव्या ओळखी, मिळालेले अनुभव, समाजाशी दृढ झालेला संवाद आणि सेवाभावाची वाढ हीच या कार्याची खरी कमाई ठरली. भविष्यात या सर्व गोष्टींचा निश्चितच सकारात्मक परिणाम दिसून येईल, याची खात्री वाटते. अशी संधी दिल्याबद्दल अमृत संस्थेचे मनापासून आभार!

संतोष जुवळे

रत्नागिरी जिल्हा व्यवस्थापक, अमृत