व्यवसाय निवडताना आधी स्वतःला ओळखणे आणि आपला ग्राहक नेमका कोण हे ओळखणे आवश्यक

महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था आणि दे आसरा फाउंडेशन यांच्या संयुक्त विद्यमाने उद्योजकता विकास प्रशिक्षणातील विशेष ऑनलाइन साप्ताहिक सत्रांची सुरुवात सात मे २०२६ रोजी झाली. दे आसरा फाउंडेशनच्या कार्यक्रम व्यवस्थापक वैशाली अपराजित यांनी पहिल्या सत्रात मार्गदर्शन केले. योग्य व्यवसाय नेमका कसा ठरवायचा, त्यासाठी कोणत्या गोष्टी विचारात घ्यायच्या आणि योग्य दिशा कशी निवडायची या विषयांबद्दल त्यांनी मार्गदर्शन केले. या सत्रात विविध ठिकाणांहून सहभागी झालेले उद्योजक एकमेकांना मदत करत होते, त्यांच्या अनुभवांची देवाणघेवाण झाली, ही उल्लेखनीय गोष्ट ठरली.

वैशाली अपराजित यांनी या सत्रात सांगितलेले काही महत्त्वाचे मुद्दे येथे दिले आहेत.

बिझनेस अर्थात व्यवसाय सुरू करताना आपल्या सक्षम बाजू आणि दुर्बळ बाजू आपल्याला माहिती पाहिजेत, अर्थात 'स्व'ची जाणीव असणे गरजेचे आहे.
आपला ग्राहक नेमका कोण आहे, हे ओळखणे महत्त्वाचे आहे.
ग्राहक आणि निर्णय घेणारा यांच्या मध्ये फरक असतो. ग्राहकांची गरज ओळखून ती पूर्ण करण्यावर भर द्यावा.
नेहमी कागद-पेन आपल्याजवळ ठेवणे व जाणवलेल्या गोष्टी लिहीत राहणे, शोधत राहणे, बाजारपेठेचा अभ्यास करत राहणे आवश्यक आहे.
आपला परिसर समजून घ्यावा. आपल्याकडे काय पिकते आणि खपते, असलेल्या संसाधनांचा सुयोग्य वापर कसा करता येईल, यावर विचार व्हायला हवा.
व्यवसायाच्या सुरुवातीच्या काळात मित्रपरिवाराकडून अभिप्राय (फीडबॅक) घेऊन त्यानुसार बदल करणे आवश्यक आहे. ग्राहकांचा अभिप्राय सतत घेत राहणे आणि त्यानुसार आपले उत्पादन किंवा सेवा यांच्यामध्ये आवश्यक ते बदल किंवा सुधारणा करत राहणे गरजेचे आहे.
सुरुवातीला आपल्या उत्पादनांची संख्या कमी ठेवावी आणि हळूहळू वाढवत न्यावी.