परतवाड्यात अमृत संस्थेतर्फे आयोजित उद्योजकता विकास प्रशिक्षणाला उत्तम प्रतिसाद

परतवाडा : महाराष्ट्र संशोधन, उन्नती व प्रशिक्षण प्रबोधिनी अर्थात अमृत या राज्य शासनाच्या स्वायत्त संस्थेतर्फे खुल्या प्रवर्गातील आर्थिक दुर्बल घटकांतील युवक-युवतींसाठी अमरावतीच्या अचलपूर तालुक्यातील परतवाडा येथे उद्योजकता विकास प्रशिक्षण कार्यक्रम आयोजित करण्यात आला होता. अत्यंत उत्साहपूर्ण वातावरणात झालेला हा कार्यक्रम सर्वांसाठी प्रेरणादायी ठरला. युवकांना स्वयंरोजगाराच्या दिशेने प्रवृत्त करून त्यांच्यामध्ये उद्योजकतेची जाणीव निर्माण करणे, रोजगारनिर्मितीला प्रोत्साहन देणे, तसेच आर्थिकदृष्ट्या सक्षम नागरिक घडविणे हा या प्रशिक्षण कार्यक्रमाचा मुख्य उद्देश होता.

या प्रशिक्षण कार्यक्रमामध्ये विविध क्षेत्रांतील व्यवसाय संधी, उद्योग उभारणीसाठी आवश्यक असलेले नियोजन, व्यवसाय व्यवस्थापन, ग्राहक सेवा, विपणन कौशल्य, आर्थिक नियोजन, बचत व गुंतवणूक, कौशल्यविकास, तसेच आधुनिक तंत्रज्ञानाचा व्यवसायात उपयोग यांसारख्या महत्त्वपूर्ण विषयांवर सखोल मार्गदर्शन करण्यात आले. प्रशिक्षणार्थ्यांना डिजिटल व्यवहार, ऑनलाइन व ऑफलाइन व्यवसाय पद्धती, सोशल मीडिया मार्केटिंग, लघुउद्योग संकल्पना, तसेच स्थानिक पातळीवर उपलब्ध असलेल्या व्यवसाय संधींबाबत प्रत्यक्ष उदाहरणांसह माहिती देण्यात आली.

प्रशिक्षक तुषार लोटांगणे यांनी उद्योजकतेचे महत्त्व स्पष्ट करताना व्यवसाय सुरू करण्यासाठी आवश्यक असलेला आत्मविश्वास, सातत्य, योग्य नियोजन आणि सकारात्मक दृष्टिकोन यावर विशेष भर दिला. त्यांनी प्रशिक्षणार्थ्यांना व्यवसायातील आव्हाने, बाजारपेठेतील स्पर्धा, ग्राहकांचा विश्वास संपादन करण्याच्या पद्धती, तसेच आर्थिक शिस्त याविषयी मार्गदर्शन केले. प्रशिक्षणात युवक-युवतींनी सक्रियपणे सहभाग घेतला, विविध व्यवसाय कल्पनांवर चर्चा केली आणि उद्योजकतेविषयीची आपली उत्सुकता व्यक्त केली.

प्रशिक्षण कार्यक्रमाच्या समारोपावेळी प्रमुख अतिथी म्हणून अमृत संस्थेचे जिल्हा उपव्यवस्थापक ऋषीकेश कथलकर उपस्थित होते. त्यांनी उपस्थित प्रशिक्षणार्थ्यांना अमृत संस्थेच्या विविध योजना, प्रशिक्षण उपक्रम आणि शासनाच्या स्वयंरोजगारविषयक संधींचा लाभ घेण्याचे आवाहन केले. युवकांनी नोकरीच्या शोधामागे न लागता स्वतःचा व्यवसाय उभारून रोजगारनिर्माते बनावे, असे मत त्यांनी व्यक्त केले. योग्य कौशल्य, मेहनत, आत्मविश्वास आणि सातत्यपूर्ण प्रयत्न यांच्या बळावर युवक मोठ्या प्रमाणात यशस्वी उद्योजक बनू शकतात, असा विश्वासही त्यांनी व्यक्त केला.

या प्रशिक्षण कार्यक्रमामुळे सहभागी युवक-युवतींमध्ये उद्योजकतेविषयी सकारात्मक दृष्टिकोन निर्माण झाला असून, भविष्यात स्वयंरोजगाराच्या माध्यमातून आर्थिक स्वावलंबन साध्य करण्यासाठी त्यांना निश्चितच प्रेरणा मिळणार असल्याचे मत उपस्थितांनी व्यक्त केले.

अमृत संस्थेच्या विविध योजना व प्रशिक्षण उपक्रमांचा लाभ घेण्यासाठी इच्छुकांनी संस्थेशी संपर्क साधावा, असे आवाहन करण्यात आले आहे.

अधिक माहितीसाठी संपर्क :

केदार गोगरकर - 9112227635

अमरावती जिल्हा व्यवस्थापक, अमृत

ऋषीकेश कथलकर - 7249451152

जिल्हा उपव्यवस्थापक 

पत्ता : अमृत विभागीय कार्यालय, 

आशीर्वाद बंगला, मालटेकडीसमोर, 

बस स्टँड रोड, अमरावती 

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, ठाकूर, जाट, लोहाना, हिंदू नेपाळी व भूमिहार अशा २५ जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.

संकेतस्थळ :https://mahaamrut.org.in/