ब्राह्मण समाजातील नागरिकांना ‘अमृत’च्या योजनांची माहिती देण्यासाठी विशेष बैठकीचे आयोजन

हिंदू महासभेचे संस्थापक अध्यक्ष श्री. आनंद दवे यांच्या पुढाकाराने व प्रमुख उपस्थितीत झालेल्या या बैठकीला ‘अमृत’ संस्थेचे व्यवस्थापकीय संचालक श्री. विजय जोशी तसेच पुणे जिल्हा व्यवस्थापक श्री. सिद्धेश केसकर यांची विशेष उपस्थिती होती. या बैठकीस परिसरातील ब्राह्मण समाजातील नागरिक, युवक तसेच विविध क्षेत्रातील इच्छुक लाभार्थी मोठ्या संख्येने उपस्थित होते.

यावेळी मार्गदर्शन करताना ‘अमृत’ संस्थेचे व्यवस्थापकीय संचालक विजय जोशी यांनी संस्थेची उद्दिष्टे, कार्यपद्धती आणि शासनामार्फत राबविण्यात येणाऱ्या विविध योजनांची सविस्तर माहिती उपस्थितांना दिली. शिक्षण, स्वयंरोजगार, व्यवसायवृद्धी आणि कौशल्य विकास या क्षेत्रांमध्ये पात्र नागरिकांना उपलब्ध असलेल्या अर्थसहाय्याच्या तसेच मार्गदर्शनाच्या विविध संधींबाबत त्यांनी माहिती दिली.

समाजातील अनेक पात्र नागरिकांना शासकीय योजनांची पुरेशी माहिती नसल्यामुळे ते उपलब्ध संधींपासून वंचित राहतात. त्यामुळे योजनांची माहिती तळागाळातील पात्र लाभार्थ्यांपर्यंत पोहोचविणे आणि त्यांना अर्ज प्रक्रिया व आवश्यक बाबींविषयी योग्य मार्गदर्शन करणे गरजेचे असल्याचे यावेळी अधोरेखित करण्यात आले.

तरुण, महिला आणि गरजू नागरिकांनी पुढाकार घेऊन ‘अमृत’च्या विविध योजनांचा सक्रियपणे लाभ घ्यावा, असे आवाहन विजय जोशी यांनी केले. केवळ योजनांची माहिती घेण्यापुरते मर्यादित न राहता पात्र लाभार्थ्यांनी उपलब्ध संधींचा उपयोग करून शिक्षण, रोजगार आणि व्यवसायाच्या माध्यमातून आर्थिक प्रगती साधावी, असेही त्यांनी सांगितले.

या बैठकीच्या आयोजनामागील भूमिका स्पष्ट करताना हिंदू महासभेचे संस्थापक अध्यक्ष आनंद दवे यांनी ‘अमृत’ संस्थेच्या पदाधिकाऱ्यांचे आभार मानले. ब्राह्मण समाजातील गरजू व पात्र घटकांपर्यंत शासनाच्या योजनांची माहिती प्रभावीपणे पोहोचविण्यासाठी अशा प्रकारची प्रत्यक्ष संवादाची एकत्रिकरणे आवश्यक असल्याचे त्यांनी सांगितले.

समाजातील युवकांना रोजगार व स्वयंरोजगाराच्या संधी उपलब्ध करून देणे, महिलांना आर्थिकदृष्ट्या सक्षम करण्यासाठी उपलब्ध योजनांचा उपयोग करून घेणे तसेच शिक्षण आणि कौशल्य विकासाच्या माध्यमातून पुढील संधी निर्माण करणे, या दृष्टीने ‘अमृत’च्या योजनांची माहिती महत्त्वपूर्ण ठरू शकते, असा सूर बैठकीत व्यक्त झाला.

बैठकीदरम्यान उपस्थित नागरिकांनी विविध योजनांबाबत प्रश्न विचारून माहिती घेतली. ‘अमृत’च्या माध्यमातून उपलब्ध असलेल्या योजनांचा लाभ घेण्यासाठी पात्रता, अर्ज प्रक्रिया आणि आवश्यक कागदपत्रांबाबतही उपस्थितांना मार्गदर्शन करण्यात आले.

या उपक्रमामुळे ब्राह्मण समाजातील नागरिकांना शासनाच्या विविध योजनांची माहिती एकाच ठिकाणी मिळण्यास मदत झाली. भविष्यातही अशा प्रकारचे मार्गदर्शनपर कार्यक्रम आयोजित करून अधिकाधिक पात्र नागरिकांना योजनांचा प्रत्यक्ष लाभ मिळवून देण्यासाठी प्रयत्न करण्याची गरज यावेळी व्यक्त करण्यात आली.

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कायस्थ, कोमटी/वैश्य, मारवाडी, पटेल, राजपूत, यलमार, अय्यंगार, राजपुरोहित, पाटीदार, नायर, नायडू, कम्मा, कानबी, सिंधी, बनिया, बंगाली, त्यागी, सेनगुनथर, गुजराथी, जाट, लोहाना, हिंदू नेपाळी ,भूमिहार व हिंदू वीरशैव लिंगायत अशा जातींचा सद्यस्थितीत समावेश आहे. अशा जातींमधील वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. राज्याच्या सर्व ३६ जिल्ह्यांमध्ये अमृत संस्थेची कार्यालये असून, अधिक माहितीसाठी अमृत संस्थेच्या आपापल्या जिल्ह्यातील कार्यालयाशी संपर्क साधावा. तसेच, अमृत संस्थेचे संकेतस्थळ आणि सोशल मीडिया हँडल्स पाहावीत.