चंद्रपुरात तीन ते पाच एप्रिल या कालावधीत भरणार अमृतपेठ थेट बाजारपेठ

चंद्रपूर : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था खुल्या प्रवर्गातील आर्थिक दुर्बल घटकांच्या सक्षमीकरणासाठी कार्यरत आहे. स्वयंरोजगार आणि उद्योजकतेला चालना देण्यासाठी विविध उपक्रम या संस्थेतर्फे राबवले जातात. अमृतपेठ थेट बाजारपेठ हा त्यांपैकीच एक उपक्रम असून, तीन ते पाच एप्रिल या कालावधीत चंद्रपूरमध्ये ही बाजारपेठ भरणार आहे. आतापर्यंत नागपूर, अमरावती, छत्रपती संभाजीनगर, खोपोली, अहिल्यानगर, कोल्हापूर, पुणे अशा अनेक शहरांमध्ये या बाजारपेठेला चांगला प्रतिसाद मिळाला आहे.

अमृतपेठ थेट बाजारपेठेच्या माध्यमातून स्थानिक उत्पादक आणि लघुउद्योजकांना त्यांच्या उत्पादनांची थेट ग्राहकांना विक्री करण्यासाठी एक उत्तम व्यासपीठ उपलब्ध होणार आहे. या विशेष बाजारपेठेत नागरिकांना विविध प्रकारची आकर्षक उत्पादने खरेदी करता येणार आहेत. स्वादिष्ट खाद्यपदार्थ, ट्रेंडी व पारंपरिक कपडे, घरगुती उपयोगाच्या वस्तू, कलात्मक हस्तकला, दागदागिने, तसेच अनेक स्वदेशी उत्पादनांचा समावेश या प्रदर्शनात असेल. त्यामुळे ग्राहकांसाठी हा एक वेगळाच आणि आनंददायी अनुभव ठरणार आहे.

‘लोकल टू व्होकल’ संकल्पनेला बळ देणे, स्वदेशी उत्पादनांना प्रोत्साहन देऊन स्थानिक उद्योजकांना हक्काची बाजारपेठ उपलब्ध करून देणे आणि नागरिकांना विश्वासार्ह, गुणवत्तापूर्ण स्थानिक उत्पादने एकाच छताखाली उपलब्ध करून देणे हा या उपक्रमाचा मुख्य उद्देश आहे. स्थानिक उत्पादकांनी या सुवर्णसंधीचा लाभ घेऊन आपला व्यवसाय व्यापक करावा. नागरिकांनी कुटुंबासह या प्रदर्शनाला भेट देऊन स्थानिक लघुउद्योजकांना प्रोत्साहन द्यावे आणि खरेदीचा आनंद घ्यावा, असे आवाहन अमृत संस्थेचे चंद्रपूर जिल्हा व्यवस्थापक विक्रम मोहन पांडे यांनी केले आहे. 

सुधीर मुनगंटीवार यांना निमंत्रण

राज्याचे माजी मंत्री, आमदार सुधीर मुनगंटीवार यांची भेट घेऊन त्यांना प्रदर्शनाचे निमंत्रण देण्यात आले. अमृतपेठेच्या माध्यमातून स्थानिक उद्योजक, महिला स्वयंसहायता गट आणि लाभार्थ्यांना मिळणाऱ्या रोजगाराच्या संधींबाबत त्यांना सविस्तर माहिती देण्यात आली. मुनगंटीवार यांनी या उपक्रमाचे मनापासून कौतुक केले. अर्थव्यवस्थेला बळ देणाऱ्या या प्रयत्नांचे त्यांनी स्वागत केले आणि पुढील वाटचालीसाठी शुभेच्छा दिल्या. या वेळी सामाजिक कार्यकर्ते सूरज पेदुलवार, अमृत संस्थेचे चंद्रपूर जिल्हा व्यवस्थापक विक्रम मोहन पांडे, जिल्हा उपव्यस्थापक आदित्य सेंगर, अमृतमित्र सतीश नारायणदास, अमृतमित्र श्रीरंग खोंड आणि अमृतसखी वैष्णवी दारवेकर उपस्थित होत्या. 

‘अमृतपेठ – थेट बाजारपेठ’ हा स्थानिक अर्थव्यवस्थेला चालना देणारा, स्वदेशी उत्पादनांना नवी ओळख देणारा आणि चंद्रपूर जिल्ह्यातील उद्योजकतेला नवी दिशा देणारा एक प्रेरणादायी उत्सव ठरणार आहे.

अमृतपेठ थेट बाजारपेठ

दिवस आणि वेळ : तीन ते पाच एप्रिल २०२६. सकाळी १० ते रात्री नऊ वाजेपर्यंत

स्थळ : कन्यका परमेश्वरी हॉल, कस्तुरबा रोड, चंद्रपूर.

अधिक माहितीसाठी संपर्क :

विक्रम मोहन पांडे – 9112228774

चंद्रपूर जिल्हा व्यवस्थापक, अमृत 

श्रीरंग खोंड – 7057909073 

वैष्णवीताई दारवेकर – 9689473020

जिल्हा कार्यालय पत्ता : गुरुद्वारा रोड, कृष्णा टॉवरजवळ, तुकूम, चंद्रपूर - 442402

ई-मेल : amrut.chandrapur.dm@mail.com

अमृत संस्थेविषयी : महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना कुठल्याही शासकीय संस्था किंवा महामंडळाचा लाभ मिळत नाही अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कोमटी, मारवाडी, ठाकूर, गुजराती, सिंधी, कायस्थ, जाट, बणिया, बंत्स, नायर अय्यंगार, पाटीदार, बंगाली, पटेल, येलमार, त्यागी, सेनगुनथर, राजपुरोहित, नायडू, एलमार इत्यादींचा समावेश आहे. अशा जातींमधल्या वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात. अधिक माहितीसाठी आपापल्या जिल्ह्यातील ‘अमृत’ कार्यालयाशी संपर्क साधावा. तसेच, ‘अमृत’चे संकेतस्थळ आणि सोशल मीडिया हँडल्स पाहावीत.

संकेतस्थळ : https://mahaamrut.org.in/